Pas largimit të Davidit, Juventusi afër të nënshkruajë me yllin nga Premierliga

Raportimet nga Italia bëjnë të ditur se Juventusi është vënë në lëvizje në përpjekje për të transferuar Nick Woltemade në Torino nga Newcastle, pasi ka arritur marrëveshje për dërgimin e Jonathan David tek Atletico Madridi.

Mund të jetë një rast i një largimi dhe një afrimi në repartin ofensiv të Juventusit në ditët e fundit të afatit kalimtar veror.

Luciano Spalletti ka kërkuar prej kohësh të afrojë një sulmues të ri për të konkurruar dhe alternuar me Randal Kolo Muanin, por “Zonja e Vjetër” fillimisht duhej të largonte lojtarët që zhgënjyen sezonin e kaluar, Davidin dhe Lois Opendan.

Openda iu bashkua Lyonit në formë huazimi në fillim të kësaj vere, ndërsa raportimet e së hënës pretendojnë se Juventus ka arritur marrëveshje për ta dërguar Davidin tek Atletico Madrid në një huazim njëvjeçar, me opsion blerjeje prej 25 milionë eurosh.

Kjo i hap rrugën afrimit të një sulmuesi të ri dhe, pavarësisht lidhjeve të fundit me Jonathan Zirkzee të Manchester Unitedit dhe Alexander Sorlothit të Atletico Madridit, raportimet në ditën e parafundit të afatit kalimtar veror bëjnë të ditur se Woltemade i Newcastle është aktualisht objektivi kryesor.