Përçarje e madhe në FIFA, po kërkohet largimi i Gianni Infantinos

Kriza brenda FIFA-s po thellohet gjithnjë e më shumë, pasi drejtori operativ i organizatës, Kevin Lamour, ka bërë thirrje publike për largimin e presidentit Gianni Infantino pas polemikave të shkaktuara nga propozimi për shitjen e aksioneve të Kupës së Botës.

Situata është përshkallëzuar ndjeshëm ditët e fundit, me UEFA-n që ka paralajmëruar bojkotimin e Kupës së Botës nëse FIFA vazhdon me planin për t’u shitur investitorëve privatë një pjesë e të drejtave komerciale të turneut.

Kundër këtij projekti janë rreshtuar edhe Konfederata Aziatike e Futbollit (AFC) dhe Konfederata e Futbollit të Amerikës së Veriut dhe Qendrore (CONCACAF).

Tashmë kundërshtimi ka arritur edhe brenda vetë FIFA-s. Këshilltari i lartë i Infantinos, Carlos Cordeiro, dha dorëheqjen gjatë ditës së sotme.

Ndërkohë, Kevin Lamour ka kërkuar hapur një ndryshim në drejtimin e FIFA-s, duke lënë të kuptohet se Infantino duhet të largohet nga posti i presidentit.

“Ky është projekti i vetëm një personi,” deklaroi Lamour për “Associated Press”.

“Jo vetëm që ky projekt nuk duhet të vazhdojë, por ka ardhur koha që drejtuesit politikë të futbollit t’i bëjnë vetes pyetjet e duhura dhe të marrin vendimet e duhura”, shtoi ai.

Lamour, i cili mban postin e drejtorit operativ të FIFA-s që nga viti 2024, kritikoi ashpër mënyrën se si Infantino e menaxhoi këtë iniciativë.

Ai tha se punonjësit e FIFA-s janë ndier “të mashtruar” nga njoftimi i nxituar për këtë plan dhe se “meritojnë më shumë sesa përçmim dhe frikësim”.

Megjithëse nuk ka ndërmend të japë dorëheqjen, Lamour sfidoi publikisht Infantinon që ta shkarkojë.

“Dhe nëse kjo do të thotë se do ta humbas vendin e punës, atëherë le të jetë kështu. Do ta kuptoj dhe do ta respektoj atë vendim. Të paktën sonte do të fle i qetë”, u shpreh ai.

Menaxhimi i dobët i propozimit për krijimin e një kompanie komerciale që do të administronte turnetë e FIFA-s dhe do të lejonte investitorë të jashtëm të blinin aksione, ka shkaktuar reagime të forta në botën e futbollit.

Për pasojë, pozita e Gianni Infantinos si president i FIFA-s duket më e lëkundur se kurrë.

Edhe nëse ai tërhiqet nga ky projekt, tashmë është e qartë se plani nuk do të siguronte votat e nevojshme për miratim, ndërsa autoriteti i tij është dobësuar ndjeshëm.

E gjithë kjo krizë shpërthen në një moment kur FIFA po përpiqet gjithashtu të zgjerojë Kupën e Botës së ardhshme në 64 kombëtare.