Qendra Klinike Universitare e Kosovës (QKUK) ka finalizuar procesin e prokurimit për renovimin e repartit të Hemodializës, projekt ky me vlerë mbi 700 mijë euro.
Sipas njoftimit zyrtar për dhënie të kontratës, punimet do të kryhen nga kompania “MBB Construction SH.P.K.” nga Prizreni, e cila është shpallur fituese e tenderit në vlerë prej 706 mijë e 922 euro e 60 centë, shkruan Gazeta Demos.
Në dokumentin e publikuar thuhet se për këtë tender kanë aplikuar gjithsej gjashtë operatorë ekonomikë, ndërsa kontrata është dhënë përmes procedurës së hapur të prokurimit publik. Kriter për përzgjedhje ka qenë oferta me çmimin më të ulët.