Kryetari i LDK-së, Lumir Abdixhiku, ka qëndruar sot në Deçan, ku gjatë një tubimi me qytetarë foli për nevojën e kthjelltësisë politike dhe përgjegjësisë institucionale në Kosovë.
Duke e krahasuar situatën aktuale me rrugën e mbuluar nga mjegulla nga Prishtina në drejtim të Deçanit, Abdixhiku tha se në mjegull njeriu nuk ndalet, por ecën me më shumë kujdes, duke kërkuar dritë dhe drejtim. Sipas tij, edhe Kosova sot ka vullnet dhe njerëz, por i mungon qartësia e duhur për të ecur përpara.
I plotë:
Rruga për në Deçan sot ishte e mbuluar me mjegull.
Nga Prishtina, në Klinë, në Pejë e deri këtu; mjegull në çdo kthesë.
Në mjegull njeriu nuk ndalet. Ecën më me kujdes. Kërkon dritë e drejtim. Ashtu është sot edhe Kosova. Jo pa njerëz, jo pa vullnet, por pa qartësi të mjaftueshme.
Në Deçan folëm për nevojën e kthjelltësisë. Për mendje të ftohtë, përgjegjësi dhe rrugë të ditur. Sepse mjegulla kalon, por drejtimi mbetet.
Deçani ka ditur gjithmonë të ecë drejt, edhe në kohë më të vështira. Prandaj këtu fjala për shpresë nuk është slogan, është përgjegjësi.
Deçani në listën e LDK-së ka kandidatë të shkëlqyer me përvojë të gjatë institucionale: me numër 17 deputeti i përhershëm i Kuvendit të Kosovës, Armend Zemaj; me numër 20 Gjeneral Fadil Hadërgjonaj dhe me numër 89 bashkatdhetari ynë nga mërgata, Zymer Lulaj.
