Abdixhiku: Zgjidhni shpresën, më 28 dhjetor vulosim kapitullin e ri për Kosovën

Kandidati i Lidhjes Demokratike të Kosovës për kryeministër, Lumir Abdixhiku, tha se kjo nuk ka qenë thjesht fushatë elektorale, por një ftesë për t’u ngritur dhe për t’u bashkuar rreth shpresës dhe arsyeshmërisë.

Ai theksoi se vendi duhet t’i japë fund krizës politike dhe ekonomike, duke hapur, siç tha, kapitullin e një republike që funksionon dhe të një shteti që respekton qytetarin.

I plotë:

Kjo nuk ishte vetëm një fushatë. Kjo është ftesë për t’u ngritur. Për t’u bashkuar. Për t’u kthyer te arsyeshmëria, te maturia, te shteti, te shpresa.

Kjo është ftesë për ta ndalur rënien, për ta mbyllur kapitullin e krizës dhe për të hapur kapitullin e një Republike që funksionon, të një shteti që respekton qytetarin, të një Kosove që ecën drejt perëndimit, jo drejt humbjes.

Sonte e nisim këtë rrugëtim së bashku.

Më 28 dhjetor, do ta vulosim së bashku.

Atë ditë, secili prej jush do ta ketë në dorë një fletë. Mund të duket e vogël, një copë letër e thjeshtë, por aty brenda është e shkruar e ardhmja e këtij vendi.

Aty është shkruar nëse Kosova do të mbetet peng i aventurës e popullizmit, apo do të kthehet në rrugën e vet natyrale – rrugën e shpresës, të zhvillimit, të integrimit euroatlantik.

Në atë fletë, zgjidhni tri shkronja të arta, ato që e bënë historinë, e që thërrasin sot për të ardhmen. Zgjidhni LDK, shpresën e parëdhe të fundit të Kosovës. Zgjidhni numrin 123, dhe kandidatët tanë nga kjo listë fituese.

Mbi të gjitha, zgjidhni shpresën.

Unë jam Lumir Abdixhiku.

Ky është ekipi i Lidhjes Demokratike të Kosovës.

Me besim në Zot, me vullnet për vendin, me dashni për njerëzit tanë dhe me përgjegjësi për të ardhmen që na pret, zotohemi se do të ju prijmë me dinjitet.