Arabia Saudite paralajmëron Iranin: Durimi nuk është i pakufizuar

Ministri i Jashtëm i Arabisë Saudite, Princi Faisal bin Farhan, ka paralajmëruar Iranin se durimi i vendeve të Gjirit ndaj sulmeve të tij nuk është i pakufizuar, duke kërkuar nga Teherani të rishqyrtojë menjëherë strategjinë.

Ai deklaroi se Arabia Saudite dhe aleatët e saj kanë kapacitete të konsiderueshme për t’iu përgjigjur, nëse vendosin të ndërmarrin veprime mbrojtëse.

Sipas tij, sulmet ndaj infrastrukturës energjetike në rajon janë të planifikuara dhe të mirë organizuara, duke hedhur poshtë pretendimet e Iranit se bëhet fjalë për reagime spontane.

Paralajmërimi vjen pas sulmeve iraniane ndaj objekteve të gazit në Katar dhe Emiratet e Bashkuara Arabe, si dhe tentativave për goditje në territorin saudit, të cilat u neutralizuan nga mbrojtja ajrore.

Rijadi theksoi se, edhe pse konflikti mund të përfundojë, rivendosja e besimit me Iranin do të jetë e vështirë dhe afatgjatë.