Avokati i Hashim Thaçit, Pierre Richard Prosper, i ka bërë thirrje Kuvendit të Kosovës për veprim pas shpalljes së aktgjykimit dënues ndaj ish-krerëve të Ushtrisë Çlirimtare të Kosovës, të cilët u dënuan me gjithsej 81 vjet burgim.
Prosper ka deklaruar se, sipas tij, drejtësia është dhunuar dhe se Kosova duhet ta trajtojë seriozisht çështjen e Gjykatës Speciale.
Ai ka kërkuar që Kuvendi i Kosovës ta shqyrtojë çështjen e mbështetjes për këtë gjykatë, duke thënë se ajo është krijuar përmes një partneriteti mes Kosovës dhe Bashkimit Evropian.
“Kosova duhet t’ia vë mendjen kësaj. Parlamenti i Kosovës duhet ta shikojë këtë. Kjo Gjykatë është teknikisht partneritet mes Kosovës dhe BE-së. Dhe po të isha unë deputet i Kosovës, do t’ia tërhiqja mbështetjen kësaj gjykata qysh nesër,” tha avokati i Thaçit.
