Deputetja e LDK-së, Hykmete Bajrami, ka kritikuar kryeministrin Albin Kurti lidhur me mosmiratimin e Projektligjit për Buxhetin e vitit 2027 brenda afatit ligjor.
Përmes një postimi në Facebook, Bajrami ka thënë se sipas Ligjit për Menaxhimin e Financave Publike dhe Përgjegjësitë, Qeveria është e obliguar që Projektligjin për Buxhetin t’ia dorëzojë Kuvendit jo më vonë se më 31 tetor.
Ajo ka theksuar se ndonëse sot është 31 tetor, projektbuxheti ende nuk është miratuar në Qeveri, ndërsa, sipas saj, Kurti ka paralajmëruar në Këshillin e Përgjithshëm të Lëvizjes Vetëvendosje se miratimi do të bëhet të hënën, më 2 nëntor.
Bajrami ka rikujtuar se vitin e kaluar Kurti kishte miratuar buxhetin më 31 tetor, duke e akuzuar atë se këtë vit po e shkel afatin ligjor.
Sipas deputetes së LDK-së, fakti që diskutimi për buxhetin është bërë fillimisht në Këshillin e Përgjithshëm të LVV-së, e më pas pritet të kalojë në Qeveri, tregon për ndikimin e partisë në proceset institucionale.
“Me gjasë, kësaj radhe janë paraparë edhe paratë për kompaninë ndërkombëtare që Dimali ka planifiku me e angazhu për t’ia treguar sasinë dhe cilësinë e punimeve në Autostradën e Gjilanit, pasi janë shpenzuar rreth 80 milionë euro e rruga ende nuk ka përfunduar, si dhe për projektet e tjera rrugore që qeveria e LVV-së nuk po arrin t’i përfundojë assesi tash e gjashtë vjet” shkroi ajo,
Ky është postimi i plotë i saj:
Buxheti i shtetit, së pari në parti e pastaj në institucione?!
Sipas Ligjit për Menaxhimin e Financave Publike dhe Përgjegjësitë, Qeveria është e obliguar që Projektligjin për Buxhetin t’ia dorëzojë Kuvendit jo më vonë se më 31 tetor.
Sot është 31 tetori, por Projektligji për Buxhetin e vitit 2027 ende nuk është miratuar në Qeveri. Kryeministri Kurti paska paralajmëru në Këshillin e Përgjithshëm të partisë së tij se buxhetin do ta miratojë të hënën, më 2 nëntor.