Kandidati i AAK-së, Besnik Krasniqi, ka reaguar ashpër lidhur me situatën aktuale energjetike në vend, duke e cilësuar krizën si të krijuar artificialisht dhe me qëllime të pastra përfitimi.
Sipas Krasniqit, qeveria në ikje ka ndalur me vetëdije projekte strategjike, si gazin amerikan dhe ndërtimin e termocentralit, duke i hapur rrugë individëve dhe grupeve të lidhura me atë që ai e quan “mafia energjetike”.
Ai thekson se kjo ka sjellë, sipas tij, vjedhjen më të madhe që i është bërë qytetarëve të Kosovës, përmes faturave të larta të energjisë elektrike.
“Kriza e krijuar artificiale e energjisë nuk është e paqëllimshme. Kjo qeveri në ikje e ndali gazin amerikan dhe e ndali ndërtimin e termocentralit, krejt qëllimshëm, duke i hapur rrugë Martin Berish*ës, Vuk Hamoviqit dhe mafies energjetike që të kryejnë vjedhjen më të madhe që i ka ndodhur këtij populli, përmes faturave të energjisë elektrike”.
Ai u ka bërë thirrje qytetarëve që më 28 dhjetor të reagojnë përmes votës, duke e quajtur këtë datë si moment vendimtar për t’i dhënë fund, siç u shpreh, keqmenaxhimit dhe abuzimeve në sektorin e energjisë.
“Sot, përveç se po përballemi me çmime enorme, po përballemi edhe me mungesë të madhe të energjisë. Energjinë, që është jetë dhe zhvillim, e kthyen në mjet grabitjeje. Më 28 Dhjetor ta shporrim këtë mafi dhe t’ia kthejmë Kosovën popullit”, tha Krasniqi.
