Carney: ShBA na sulmoi, Kanadaja do t’u përgjigjet tarifave “dollar për dollar”

Kryeministri kanadez Mark Carney ka deklaruar se vala e re e tarifave amerikane ndaj Kanadasë është një “llogaritje e gabuar”, e cila synon ta “lëndojë dhe përçajë” vendin, pasi negociatat tregtare mes dy vendeve dështuan të premten mbrëma.

“Ata kërkuan shumë dhe ofruan shumë pak”, tha Carney të shtunën, duke shtuar se ShBA-ja dhe Kanadaja tashmë ndodhen në një “luftë tregtare”. “Je në luftë kur sulmohesh. Ne u sulmuam”, u shpreh ai.

Carney konfirmoi se Kanadaja do t’u përgjigjet tarifave amerikane me masa të njëjta, “dollar për dollar”, duke nisur nga 8 shtatori. Masat do të përfshijnë edhe tarifa ndaj çelikut, produkteve të qumështit, pajisjeve elektroshtëpiake dhe produkteve elektronike.

Dështimi i negociatave ka tronditur marrëdhëniet tregtare mes dy vendeve, të cilat kanë ekonomi dhe tregti të ndërthurura ngushtë, ndërsa ende nuk ka një rrugë të qartë për zgjidhjen e mosmarrëveshjes. Presidenti amerikan Donald Trump nuk ka reaguar ende për zhvillimet.

“Nuk mund ta pranojmë atë që kanë ofruar dhe nuk do t’ua japim atë që kanë kërkuar”, deklaroi Carney, shkruan BBC.

Vetëm pak ditë më parë, të dyja palët shfaqeshin optimiste për arritjen e një marrëveshjeje, por negociatat u përshkallëzuan pasi ShBA-ja dhe Kanadaja akuzuan njëra-tjetrën për ndryshime në momentet e fundit.

Pas dështimit të bisedimeve, Kanadaja është përballur me tarifa të reja amerikane prej 50 për qind për një sërë produktesh kanadeze, krahas tarifave që tashmë janë në fuqi për çelikun, aluminin, automjetet dhe lëndën e drurit.

Tarifat e reja janë të kufizuara në shtrirje dhe prekin rreth 20 miliardë dollarë importe kanadeze, ose afërsisht 5 për qind të totalit. Ato përfshijnë produkte si vera, produktet e qumështit, çimentoja, veshmbathjet dhe pajisjet e hokejit.

Carney tha se Kanadaja po kundërpërgjigjet “me ngurrim”, me qëllim mbrojtjen e interesave të saj. Sipas tij, detajet e masave hakmarrëse do të bëhen publike gjatë ditëve në vijim.

Kryeministri kanadez ka marrë mbështetje edhe nga liderët e partive të tjera federale, përfshirë opozitën konservatore, si dhe nga disa kryeministra provincialë.

Tarifat doganore kanë qenë një prej shtyllave kryesore të politikës tregtare të Trumpit. Presidenti amerikan argumenton se ato do të forcojnë prodhimin vendas dhe do të krijojnë vende të reja pune në ShBA.

Kritikët, megjithatë, thonë se tarifat kanë rritur çmimet për konsumatorët amerikanë dhe kanë shkaktuar pasoja negative për ekonominë globale.