76-vjeçar dyshohet se ka tentuar të vrasë bashkëshorten e tij, duke e plagosur rëndë me një send të fortë.
Sipas Policisë së Durrësit, menjëherë pas marrjes së njoftimit, shërbimet policore kanë ndërhyrë në adresën e dhënë, duke parandaluar përshkallëzimin e mëtejshëm të dhunës që mund të kishte pasur pasoja fatale.
Në bashkëpunim me Specialistët për Hetimin e Krimeve ndaj Personit, është arrestuar në flagrancë shtetasi A. R., 76 vjeç, i dyshuar si autor i ngjarjes.
Hetimet paraprake treguan se gjatë një konflikti për motive të dobëta, i moshuari ka goditur në kokë me një shkop druri bashkëshorten e tij, F. D., 70 vjeçe, duke i shkaktuar dëmtime të rënda. Viktima u transportua me urgjencë në Spitalin e Traumës në Tiranë, ku po merr trajtimin e nevojshëm mjekësor.
