Konjufca për FSK-në në Gaza: Kosova sot kontribuon në paqen dhe sigurinë globale

Ministri i Jashtëm i Kosovës, Glauk Konjufca, ka bërë të ditur se Kosova është ndër vendet që mbështesin Forcën Ndërkombëtare të Stabilizimit për Gazën dhe se është e gatshme të japë kontributin e saj.

Përmes një postimi në platformën “X”, Konjufca ka shkruar për takimin informues të nivelit të lartë të Bordit të Paqes, ku është diskutuar për Forcën Ndërkombëtare të Stabilizimit për Gazën.

Konjufca ka theksuar se Kosova, 27 vjet pas ndërhyrjes së NATO-s, sot kontribuon në paqen dhe sigurinë globale.

Ai ka bërë të ditur se Republika e Kosovës është e gatshme të japë kontributin e saj në këtë angazhim.

Postimi i plotë:

Më shumë se një mijë kilometra e ndajnë Kosovën nga Gaza, por përgjegjësia për paqen dhe sigurinë nuk ndalet në kufij.

Në brifingun e sotëm të nivelit të lartë të Bordit të Paqes, Republika e Kosovës ishte mes vendeve që mbështesin Forcën Ndërkombëtare të Stabilizimit për Gazën.

27 vjet pas ndërhyrjes së NATO-s, Kosova është një histori suksesi: nga një vend që dikur kishte nevojë për mbështetjen e bashkësisë ndërkombëtare, sot kontribuojmë për paqen dhe sigurinë globale.

Republika e Kosovës është e gatshme të japë kontributin e saj.