Deputeti i Vetëvendosjes: Javën tjetër mund të konstituojmë Kuvendin

Deputeti i zgjedhur i Lëvizjes Vetëvendosje, Alban Bajrami, ka shprehur shpresën se gjatë javës së ardhshme do të bëhet konstituimi i Kuvendit të Kosovës, duke theksuar rëndësinë e formimit sa më të shpejtë të institucioneve të reja.

Ai tha se miratimi i buxhetit dhe marrëveshjeve ndërkombëtare është urgjent, duke shtuar se vonesat e deritanishme kanë sjellë humbje kohe për vendin.

“Shpresoj shumë që javën e ardhshme të mund ta konstituojmë Kuvendin, sepse është shumë e rëndësishme që sa më parë të votohet Qeveria dhe ministrat. Kjo për shkak të buxhetit dhe marrëveshjeve ndërkombëtare, të cilat janë tejet urgjente në raport me kohën që kemi humbur”, tha Bajrami në ATV.

Sipas tij, nuk priten pengesa në procesin e certifikimit të zgjedhjeve, pasi, siç u shpreh ai, procesi i ankesave ka përfunduar dhe ato nuk janë marrë parasysh për shkak të mungesës së bazës së fortë ligjore.

“Shpresoj që java që po vjen të jetë pozitive. Ekziston një mundësi shumë e madhe që procesi i ankesave të ketë përfunduar dhe të mos ketë pengesa për certifikimin e zgjedhjeve, gjë që i hap rrugë formimit të institucioneve të reja”, përfundoi ai.