Deputeti kanadez, Kyle Seeback, i martuar me një shqiptare nga Kosova, ka uruar qytetarët e Kosovës për shënimin e 18-vjetorit të pavarësisë, duke theksuar lidhjet e forta ndërmjet dy shteteve.
Në fjalimin e tij në parlamentin kanadez, Seeback u shpreh se ky jubile është për të diçka personale.
“Kosova shënon 18 vjetorin e pavarësisë javën e ardhshme – dhe për mua, kjo është thellësisht personale. Kanada ka një miqësi të gjatë me Kosovën dhe jam krenar që jemi ndër të parat shtete që e kemi njohur pavarësinë e Kosovës. Gruaja ime është nga Kosova dhe kemi kaluar një pjesë të muajit të mjaltit atje, ku e kemi shijuar ushqimin e jashtëzakonshëm dhe kam mësuar shumë për kulturën e tyre të pasur. Kosovarët janë shumë krenarë me vendin e tyre. Dhe kam një këshillë, nëse jeni në Kosovë, shkoni në Rahovec dhe pini makiato, kafja më e mirë që kam pirë në jetën time”, tha ai.
Seeback përmendi gjithashtu se djali i tij mban emrin William Kastritot Seeback, në nderim të heroit të shqiptarëve. “Për kosovarët këtu në Kanada dhe anembanë botës, urime Dita e Pavarësisë”, shtoi ai.
