Dështon mbledhja e Kryesisë së Kuvendit, Haxhiu del në konferencë – flet për pagat kalimtare të deputetëve

Mbledhja e Kryesisë së Kuvendit, e paraparë të fillonte në orën 11:00, ka dështuar.

Kryeparlamentarja, Albulena Haxhiu, njëherit Ushtruesja e Detyrës së Presidentes, tha se në mbledhje ishin veç ajo dhe Emilija Rexhepi.

“Në këtë mbledhje të Kryesisë isha vetëm unë, nënkryetarja e Kuvendit, Emilija Rexhepi dhe në anën tjetër nuk ishin anëtarët e tjerë të Kryesisë. Kam informacione që z.Gola është jashtë vendit, për tjerët s’kam informacione”, ka deklaruar Haxhiu.

Ajo foli edhe për pagat kalimtare të deputetëve, për çka tha se kjo është e rregulluar me ligj.

Por, tha se nëse ka iniciativa në të ardhmen për ndryshime, është e hapur për diskutime.

“Ta zëmë një muaj me qenë deputet, pastaj pagën kalimtare e merr për një vit, kjo nuk është e drejtë, por është e bazuar në legjislacionin në fuqi”, shtoi Haxhiu, duke thënë se pastaj është çështje e diskutimeve nëse kjo është e drejtë apo jo.

Haxhiu foli edhe për zgjedhjet e 7 qershorit, duke deklaruar se “Nuk ka pasur asnjë nevojë që vendi të shkojë në zgjedhje të jashtëzakonshme”.

Kuvendi është shpërndarë më 29 prill, pas përfundimit të afatit kushtetues 34 ditor për zgjedhjen e Presidentit.

Gjykata Kushtetuese me aktgjykim kishte përcaktuar që Kuvendi shpërndahet me automatizëm nëse brenda këtij afati nuk zgjidhet presidenti.