Kosova duhet të përshpejtojë reformat ligjore në përputhje me kërkesat e Bashkimit Europian, të rrisë investimet publike dhe të zhvillojë kapacitetet energjetike, në mënyrë që të krijojë kushte për zhvillim ekonomik dhe tërheqjen e investitorëve. Ndërkaq, avancimi i partneritetit strategjik me Shtetet e Bashkuara të Amerikës mbetet i lidhur me përmbushjen e detyrimeve të Kosovës ndaj komuniteteve pakicë, sipas drejtorit ekzekutiv të Odës Ekonomike Amerikane në Kosovë, Arian Zeka.
Zeka thotë se mosfunksionimi i institucioneve gjatë viteve të fundit ka bërë që shumë punë dhe detyra të mbeten pa u realizuar.
“Ka shumë detyra dhe ka shumë punë të cilat nuk janë realizuar përgjatë viteve të fundit. Natyrisht, për shkak të mosfunksionimit të institucioneve, do ta theksoja, meqenëse ne synojmë që të anëtarësohemi në strukturat euroatlantike, në Bashkimin Evropian dhe në NATO. Besoj që vazhdimi i reformës së legjislacionit sipas kërkesave të Bashkimit Evropian, edhe atyre kërkesave që lidhen sidomos me instrumentet financiare të Bashkimit Evropian, prej të cilave nuk kemi mundur të përfitojmë sa duhet në këto dy-tre vitet e fundit, duhet të jetë prioriteti numër një. Pastaj natyrisht është rritja e investimeve publike. Fatkeqësisht, nuk po shohim diçka të tillë”, deklaron Zeka për Kosova Press.
Derisa tregon edhe ky duhet të jetë fokusi i qeverisë për zhvillim ekonomik të vendit.
