Vesel Demaku është një nga 27 futbollistët e ftuar te kombëtarja e Kosovës, për ndeshjet e shtatorit/tetorit.
Mesfushori, megjithatë, nuk ishte pjesë e listës finale në ndeshjen e parë të Ligës së Kombeve për ndeshjen ndaj Irlandës, të cilën Kosova e fitoi 1-0, me golin e Vedat Muriqit.
Gjithsesi ka shpresë që ai mund të luajë në ndeshjen ndaj Austrisë, e cila do të jetë e veçantë për Demakun.
Kështu ka thënë edhe vetë ai për një medium austriak, para ndeshjes së nesërme, mes Kosovës dhe Austrisë, që do të luhet në Vjenë.
Demaku ka lindur në Austri, mirëpo e zgjodhi kombëtaren e Kosovës, pasi ka rrënjët nga shteti ynë.
Mesfushori i Kosovës ka rrëfyer për gazetën austriake “Der Standard” arsyet që e shtynë të zgjedhë përfaqësimin e Kosovës para Austrisë.
Demaku ka treguar se ky vendim ka edhe një rëndësi të veçantë familjare, pasi mban emrin e gjyshit të tij, Veselit, i cili humbi jetën gjatë luftës në Kosovë.
“Kur luaj për Kosovën, për mua dhe familjen time është një gjë shumë e madhe”, ka deklaruar Demaku.
Ai ka thënë se është mirënjohës ndaj Austrisë, ku familja e tij gjeti strehim dhe ku ai u rrit. Megjithatë, përfaqësimin e Kosovës e ka përshkruar si një vendim të marrë me bindje të plotë.
Demaku ka theksuar gjithashtu se një pjesëmarrje e Kosovës në një Kampionat Botëror ose Evropian do të ishte diçka e jashtëzakonshme për vendin.
Ndeshja Austri – Kosovë do të luhet nesër, me fillim nga ora 18:00.
Dy kombëtaret kanë nga tri pikë, nga ndeshjet e para, pasi edhe Austria fitoi ndaj Izraelit, me shifrat prej 3-1.
