Emrin e partisë ia mbajnë, emrin e saj e lanë: Qysh Peci e Gërvalla ia kthyen shpinën Osmanit për as dy muaj

Ngjitjen politike e kishin falë saj.

Emrin e partisë së saj e bartin ende, emrin e saj e braktisën.

Partia “Guxo” e formuar nga Vjosa Osmani, heshti deri në fund për ish-themeltaren e tyre.

Vetëvendosja e Albin Kurtit, pasi pranoi tri favore të mëdha parazgjedhore nga Osmani, pas zgjedhjeve e hoqi nga konsiderata.

Faton Peci dhe Donika Gërvalla dy kryetarët e Guxo-s i kishin fjalët e mëdha në mbështetje të Osmanit deri në atë kohë.

“Zot runa”, thoshte Faton Peci në një intervistë në ATV pasi Vetëvendosja fitoi 51.1%, “nëse na bllokojnë në zgjedhjen e presidentes”.

Njëjtë edhe Donika Gërvalla, kërcënonte opozitën se çfarë do të pasonte për ta, nëse nuk e votojnë Vjosa Osmanin për mandat tjetër.

Që të dy fjalët për Osmanin i kishin në superlativ, dhe kandidatura e saj, sipas tyre, ishte gjë që s’kishte nevojë as të thuhej.

Por, rrugës ndërroi gjithçka.

Partia “Guxo” u rreshtua me Albin Kurtin kur Osmani njoftoi synimin e saj për një mandat të dytë.

Në “Debat Plus” Sekretaresha e partisë “Guxo” pati thënë se si parti do të dalin me qëndrim të unifikuar të partisë, dhe s’dolën asnjëherë.

Madje ajo në insistimin e moderatorit Ermal Panduri, pyetur se a janë pro, tek e fundit, në mbështetje të Osmanit, pati thënë se “sigurisht që po.”

Por, ajo del t’i kishte tejklauar autorizimet e saj: dhe çortimet ndaj saj, siç pati mësuar Nacionale, ishin serioze nga Donika Gërvalla.

Ajo vetë ishte shndërruar një linjë të hekurt të refuzimit ndaj Osmanit.

I kishte shtrënguar deputetët nën patronazhin e vet të ishin kundër Osmanit në mbledhjet e GUXO-s.

Faton Peci s’u bë asnjëherë i gjallë në mbështetetje të Vjosa Osmanit.

Mbyllja e telefonit “në sekond.”

Dy deputetë të Guxo refuzuan të përgjigjen për presidenten aktuale, Vjosa Osmani.

Moderatori Ermal Panduri i telefonoi deputetët Fatos Geci dhe Aferdita Hajrizi gjatë transmetimit.

Pasi kuptoi arsyen e telefonatës, deputeti Geci e mbylli menjëherë telefonin.

E njëjta situatë ndodhi edhe me deputeten Aferdita Hajrizi.

“Përshëndetje, urdhëroni,” tha fillimisht Hajrizi, përpara se ta ndërpriste telefonatën pa e dëgjuar plotësisht pyetjen.

Edhe deputeti Nezr Kraki shmangu gazetarët para mbledhjes së Grupit Parlamentar të Vetëvendosjes.

I pyetur për zgjedhjen e presidentit, ai dha vetëm një përgjigje të shkurtër.

“Nëse vjen puna, votoj për,” deklaroi Kraki.

Gazeta Nacionale raportoi se Donika Gërvalla është kundërshtarja kryesore e rizgjedhjes së Vjosa Osmanit presidente.

E kontaktuar nga gazetarët, Gërvalla refuzonte të jepte qëndrim publik.

“Jo faleminderit shumë. Jam duke shkuar në zyre. Ditën e mirë,” tha ajo.

Sipas burimeve të gazetës, Gërvalla ka kërkuar nga deputetët e partisë të mos bëjnë deklarata për Osmanin.

Ministri i Rinisë dhe Sportit, Blerim Gashani, ndante të njëjtin qëndrim.

Megjithatë, deputeti Haxhi Avdyli është shprehur hapur në favor të mandatit të dytë të presidentes.

“Vjosa Osmani në pesëvjeçarin e kaluar ka treguar një performancë dhe paraqitje brilante në përfaqësimin e Kosovës jashtë vendit ,” deklaronte Avdyli.