Instituti Hidrometeorologjik i Kosovës (IHMK) ka publikuar parashikimin e motit për fundjavën e 14 dhe 15 nëntorit, ku pritet mot kryesisht i vranët dhe me reshje shiu.
Sipas IHMK-së, e shtuna do të karakterizohet me mot më të freskët, vranësira dhe riga shiu, ndërsa në viset malore parashihen reshje bore.
Temperaturat minimale të shtunën do të lëvizin nga 1 deri në 4 gradë Celsius, kurse maksimalet nga 4 deri në 7 gradë Celsius. Era do të fryjë nga veriperëndimi, me shpejtësi prej 1 deri në 7 metra në sekondë.
Ndërkaq, të dielën pritet rritje e temperaturave, me minimale nga 0 deri në 2 gradë Celsius dhe maksimale nga 9 deri në 13 gradë Celsius.
Moti do të jetë me vranësira të shpërndara dhe intervale me diell, por nuk përjashtohet mundësia për reshje shiu. Era do të fryjë nga jugperëndimi, me shpejtësi prej 1 deri në 3 metra në sekondë.
IHMK vlerëson se kushtet biometeorologjike gjatë fundjavës do të jenë kryesisht të pafavorshme, për shkak të vranësirave, reshjeve dhe temperaturave të ulëta. Këto kushte mund të ndikojnë veçanërisht te personat me sëmundje kronike, reumatike dhe probleme kardiovaskulare.
