Koalicioni i OJQ-ve për Mbrojtjen e Fëmijëve – KOMF shpreh shqetësim të thellë lidhur me pamjet e publikuara në media, ku një vajzë 12-vjeçare është dhunuar nga një vajzë 18-vjeçare.
KOMF thekson se dhuna ndaj fëmijëve nuk mund të trajtohet thjesht si një incident i izoluar. Përveç aktit të dhunës ndaj fëmijës, shqetësues është edhe fakti se dhuna është filmuar dhe është bërë publike. Ekspozimi i tillë mund të rëndojë më tej gjendjen e viktimës, duke rritur rrezikun e stigmatizimit, ritraumatizimit dhe cenimit të privatësisë së saj.
KOMF bën thirrje për aktivizimin e menjëhershëm të mekanizmave të mbrojtjes së fëmijëve në nivel lokal, përfshirë Qendrat për Punë Sociale dhe shërbimet psiko-sociale, me qëllim mbrojtjen, mbështetjen dhe rehabilitimin e viktimës.
Njëkohësisht, KOMF kërkon ndërmarrjen e masave të menjëhershme nga institucionet përgjegjëse të rendit dhe drejtësisë ndaj personave të përfshirë, në përputhje me legjislacionin në fuqi dhe duke pasur në qendër interesin më të mirë të fëmijës.
KOMF kërkon gjithashtu fuqizimin e shërbimeve dhe programeve parandaluese ndaj dhunës, përmes mbështetjes së familjeve, edukimit në shkolla, ofrimit të mbështetjes për shëndetin mendor të fëmijëve dhe të rinjve, si dhe programeve që promovojnë respektin, tolerancën dhe zgjidhjen paqësore të konflikteve.
KOMF ka theksuar edhe më parë se sistemi i mbrojtjes së fëmijëve përballet me mangësi të mëdha në parandalimin, identifikimin e hershëm dhe mbrojtjen e fëmijëve nga dhuna. Përmasat që ka marrë kjo dukuri kërkojnë një fokus shumë më të madh në parandalim dhe edukim, përmes fuqizimit të prindërve për rritje dhe disiplinim pa dhunë, edukimit në shkolla dhe ndërhyrjes së hershme ndaj sjelljeve të rrezikshme.
“Parandalimi i dhunës duhet të jetë përgjegjësi e përbashkët e familjes, shkollës, institucioneve dhe shoqërisë në tërësi. Vetëm përmes ndërhyrjes së hershme dhe fuqizimit të mekanizmave të mbrojtjes mund të ndërpritet cikli i dhunës dhe bartja e saj nga një gjeneratë në tjetrën”, thekson KOMF.
KOMF u bën thirrje institucioneve që të veprojnë me urgjencë dhe me ndjeshmëri të plotë ndaj viktimës, duke garantuar mbrojtjen e dinjitetit, privatësisë dhe të drejtave të fëmijës
