Komisioni i Ligjeve rrëzon kërkesën e PD-së për shkarkimin e Presidentit Begaj

Komisioni i Ligjeve ka rrëzuar kërkesën e Partisë Demokratike për shkarkimin e Presidentit të Republikës së Shqipërisë, Bajram Begaj.

Vendimi u mor me nëntë votat e mazhorancës, ndërsa raporti i Komisionit do t’i dërgohet për shqyrtim seancës plenare, raporton A2 CNN.

Gjatë mbledhjes, përfaqësuesi i PD-së në Komision, deputeti Gjin Gjoni, paraqiti arsyet pse opozita kërkon shkarkimin e kreut të shtetit, duke renditur disa shkelje që sipas tij janë kryer gjatë ushtrimit të detyrës nga Presidenti Begaj.

Sipas Gjonit, dekreti për zgjedhjet e pjesshme në Bashkinë e Tiranës është anti-kushtetues dhe përbën tejkalim të kompetencave nga ana e Presidentit.

“Grupi i PD ka paraqitur kërkesën për fillimin e procedurës parlamentare për shkarkimin e Presidentit Begaj. Ne jemi të bindur se Begaj nuk mund të vazhdojë të jetë kryetar i shtetit dhe përfaqësues i unitetit të popullit. Kemi arritur në konkluzionin që Begaj ka konsumuar 7 shkelje të Kushtetutës dhe ligjit, mjaftueshëm për ta shkarkuar atë.

Konkretisht shkeljet e rënda të Kushtetutës nga Begaj janë si vijon:

Dekreti antikushtetues për zgjedhjet në Bashkinë Tiranë. Në kundërshtim me Kushtetutën, Begaj dekretoi zgjedhje të pjesshme vendore në Bashkinë e Tiranës, pa u krijuar nga pikëpamja kushtetuese vakanca.

Ka futur në ngërç kushtetues zgjedhjet në Bashkinë e Tiranës. Ka minuar legjitimitetin e tyre, duke shkaktuar konfuzion te zgjedhësit. Ka marrë kompetencat e sistemit gjyqësor,”* tha mes të tjerash Gjoni.

Pas këtij vendimi, pritet që çështja të diskutohet në Kuvend, ku do të vendoset nëse kërkesa për shkarkim do të kalojë për shqyrtim të mëtejshëm.