Agjencia e Ushqimit dhe Veterinarisë (AUV) ka konfirmuar praninë e sëmundjes virale Lija e Deleve/Dhive (Sheep Pox/Goat Pox) në një fermë të deleve në fshatin Delloc të Komunës së Suharekës.
Sipas njoftimit zyrtar, prania e sëmundjes është vërtetuar pas analizave laboratorike të kryera në Laboratorin e Ushqimit dhe Veterinarisë. Menjëherë pas konfirmimit të rastit, ekipet e AUV-së, në bashkëpunim me veterinerët privatë dhe institucionet përkatëse, kanë ndërmarrë masa për izolimin e rastit dhe parandalimin e përhapjes së mëtejshme të sëmundjes, shkruan Gazeta Demos.
Në bazë të Ligjit Nr. 2004/21 për Veterinarinë, Ministria e Bujqësisë, Pylltarisë dhe Zhvillimit Rural, përmes AUV-së, ka vendosur masa të përgjithshme mbrojtëse që zbatohen në të gjithë territorin e Kosovës.
Ndër masat kryesore të vendosura janë:
Autoritetet kanë bërë të ditur se, përjashtimisht, lejohet transporti i kafshëve nga fermat e paprekura nga sëmundja drejt thertoreve të licencuara, vetëm me autorizim paraprak të inspektorit veterinar.
Po ashtu, të gjitha tregjet e kafshëve të imta janë urdhëruar të pezullojnë aktivitetin deri në një vendim tjetër.
Lija e deleve dhe dhive është një sëmundje virale shumë ngjitëse që prek këto dy specie dhe shkaktohet nga virusi i familjes Capripoxvirus. Ajo konsiderohet një nga sëmundjet më serioze për sektorin e blegtorisë për shkak të dëmeve të mëdha ekonomike që mund të shkaktojë.