Konjufca mandatar, Abdixhiku: S’është fundi i botës të thuhet s’i kemi numrat, çdo vonesë taktikë politike

Kryetari i LDK-së, Lumir Abdixhiku në konferencë për media ka qenë se mandatari për Kryeministër, Glauk Konjufca dhe Lëvizja Vetëvendosje duhet të jenë të sinqertë me veten që nuk i kanë numrat.

Ai tha se çdo përpjekje për të zvarritur këtë proces bëhet për kalkulime elektorale, ndërsa shtoi se s’është fundi i botës po të thonë se s’i kanë numrat.

“Glauk Konjufca me mandatar të trashëguar, duhet të jetë i sinqertë me veten më shumë se Kryetari i tij dhe të konstatoj se nuk ka shumicë. Çdo përpjekje për të zvarritur këtë proces për kalkulime elektorale janë përpjekje të një pushteti që disi nuk e lëshon dot karrigen e vet.

Kjo sjellje është pak edhe marre politike e një gjenerate të re që duhet të tregoj dinjitet dhe respekt ndaj qytretarëve. Nuk është fundi i botës të thuhet s’kemi shumicë. Sa ma heret që Konjufca e ndërpret konsumimin e ditëve, aq më shpejt zgjidhet kriza”, tha Abdixhiku në konferencë për media.

Kryetari Abdixhiku bëri thirrje që të sillen të përgjegjshëm dhe theksoi se zgjidhja e vetme janë zgjedhjet.

“Sot për fund, pas refuzimeve, pas 8 muajve bllokadë, LDK bën thirrje që të sillemi vetëm një herë të përgjegjshëm. Zgjidhja e vetme fatkeqsisht zgjedhjet. Çdo vonesë është taktikë politike”, tha ai.