Zëvendëskryeministri i Parë dhe Ministri në detyrë i Punëve të Jashtme dhe Diasporës, Glauk Konjufca, ka pritur në takim lamtumirës Ambasadorin e Francës në Kosovë, Olivier Guérot.
Gjatë takimit, Konjufca e ka falënderuar ambasadorin Guérot për angazhimin dhe kontributin e tij gjatë mandatit në Kosovë, si dhe për bashkëpunimin e afërt në forcimin e marrëdhënieve ndërmjet Kosovës dhe Francës.
Konjufca ka vlerësuar gjithashtu rolin e Francës si shtet mik dhe partner i Kosovës, duke theksuar mbështetjen franceze në proceset e rëndësishme të shtetndërtimit, integrimit evropian dhe fuqizimit të subjektivitetit ndërkombëtar të Kosovës.
Në fund të takimit, Konjufca i ka uruar ambasadorit Guérot suksese në angazhimet e tij të ardhshme dhe ka shprehur përkushtimin e Kosovës për të vazhduar thellimin e bashkëpunimit me Francën në fushat me interes të përbashkët.
