Kryeministri në detyrë, Albin Kurti, ka kërkuar nga bashkësia ndërkombëtare që të ushtrojë presion ndaj Serbisë për hapjen e dosjeve dhe arkivave që mund të ndihmojnë në zbardhjen e fatit të personave të zhdukur gjatë luftës në Kosovë.
Kurti këto deklarata i bëri sot, në Ditën Ndërkombëtare të Personave të Zhdukur me Dhunë, pas homazheve te Monumenti i Personave të Zhdukur në Prishtinë, ku mori pjesë së bashku me ushtruesen e detyrës së presidentes, Albulena Haxhiu.
Ai tha se nuk mund të pritet edhe më gjatë për hapjen e dosjeve të klasifikuara.
“Kanë kaluar 12 vjet nga klasifikimi i kësaj dosjeje. Nuk mund të presim edhe 18 vjet të tjera, deri në vitin 2044. Ato duhet të hapen", tha Kurti.
Kryeministri në detyrë kërkoi nga faktorët ndërkombëtarë, veçanërisht nga Bashkimi Evropian, që të bëjnë presion ndaj Serbisë.
“Kërkojmë nga të gjithë faktorët ndërkombëtarë, e posaçërisht nga BE-ja, që të bëjnë trysni për hapjen e këtyre dosjeve. Serbisë i jepen qindra miliona euro dhe kjo duhet të shoqërohet me kërkesë për hapjen e arkivave. Shtetit tonë po i kushton shumë të bëjmë gjurmime e gërmime, të humbim shumë kohë dhe të marrim informacione jo të plota e jo të sakta. Është shumë frustruese për organet e shtetit që të bëjnë gjithë këto gërmime dhe të gjejnë megjithatë jo shumë trupa. Hapja e dosjeve në Beograd është jetike për zbardhjen e së vërtetës dhe varrimet dinjitoze të më të dashurve tanë, e sidomos për familjet e tyre që presin në ankth”, deklaroi Kurti.
