Kryeministri i Kosovës, Albin Kurti, ka pritur sot në Prishtinë dyshen e njohur muzikore “Shkodra Elektronike”, të cilët përfaqësuan Shqipërinë në Eurovision 2025 me këngën “Zjerm”.
Në takim u vlerësua suksesi i tyre në Eurovision, ku u renditën mes 10 këngëve më të votuara të natës dhe u përmendën nga media ndërkombëtare si The Guardian, për një ndër performancat më unike të këtij edicioni.
Dyshja karizmatike, Beatriçe dhe Kola, erdhën “plot zjerm” edhe për publikun kosovar, duke ndezur skenën e FemArt me stilin e tyre të veçantë elektro-pop.
Kurti foli me ta edhe për këngën e tyre më të re “Shndrit!”, që po pritet shumë mirë nga publiku dhe kritikët, si dhe për planet e ardhshme që përfshijnë turne ndërkombëtare dhe bashkëpunime artistike. “Siouxsie and the Banshees dhe Sisters of Mercy ishin për Britaninë; për ne është bindshëm Shkodra Elektronike – një emër që nuk ndalet, as në studio, as në skenë”, u shpreh Kurti.
