Lidhja e Bizneseve të Kosovës (LBK) ka organizuar një takim B2B ndërmjet bizneseve nga Kosova dhe Turqia, me qëllim të krijimit të kontakteve të drejtpërdrejta, zgjerimit të bashkëpunimit ekonomik dhe identifikimit të mundësive të reja për tregti, investime dhe partneritete.
Në takim morën pjesë biznese kosovare nga sektorë të ndryshëm, përfshirë prodhimin, përpunimin, tekstilin, energjinë, ndërtimin, infrastrukturën, bujqësinë , dhe sektorë të tjerë, ndërsa bizneset nga Turqia prezantuan interesat dhe mundësitë e tyre për bashkëpunim me kompanitë kosovare.
Kryetari i Lidhjes së Bizneseve të Kosovës, Prof. Dr. Besart Dreshaj, theksoi se qëllimi i LBK-së është që marrëdhëniet ekonomike Kosovë–Turqi të avancohen nga tregtia drejt investimeve dhe prodhimit të përbashkët.
“Të mos mendojmë vetëm çfarë mund t’i shesë Turqia Kosovës apo çfarë mund t’i shesë Kosova Turqisë. Le të mendojmë çfarë mund të prodhojmë së bashku, ku mund të investojmë së bashku dhe në cilat tregje mund të hyjmë së bashku.”
Dreshaj theksoi gjithashtu potencialin e Kosovës si hapësirë për investime dhe si pikë lidhëse për kompanitë që synojnë zgjerimin e aktiviteteve të tyre në tregjet rajonale dhe evropiane.
