LDK-ja pajtohet për bashkëpunim me VV-në, Haziri: Marrëveshja varet nga negociatat

Lidhja Demokratike e Kosovës ka arritur pajtim që të bashkëpunojë me Lëvizjen Vetëvendosje për formimin e institucioneve të reja, ndërsa brenda kësaj partie vazhdojnë të jenë të pranishme dallimet rreth këtij procesi.

Nënkryetari i LDK-së, Lutfi Haziri, ka thënë se gjatë kuvendit partiak të mbajtur më 20 korrik është arritur pajtimi që ky subjekt të bashkëpunojë me partinë e kryeministrit në detyrë, Albin Kurti.

Ai ka theksuar se, pavarësisht dallimeve të dukshme brenda LDK-së, kjo parti tash gjendet përballë ofertës nga subjekti i parë fitues i zgjedhjeve, Lëvizja Vetëvendosje, për një bashkëpunim të mundshëm.

Në një intervistë për Radion Evropa e Lirë, Haziri ka bërë të ditur se parimet që LDK-ja i ka vendosur si parakushte për një marrëveshje të mundshme me LVV-në janë: marrëveshje për të gjitha institucionet – Kuvendin, Qeverinë dhe Presidencën – ose asnjë marrëveshje; agjenda shtetërore, politika sektoriale, programet qeverisëse, interesi i vendit si dhe ndarja e përgjegjësive.

“Këto tri parime neve na bashkojnë si Grup Parlamentar. Kuvendi [i LDK-së] ka kërkuar që kjo e drejtë të ushtrohet deri në fund. Se si do të përmbyllet kjo kërkesë, tani është çështje e negociatave [me LVV-në]”, ka deklaruar Haziri.

Ai ka shtuar se që nga bisedimet e para formale, të zhvilluara më 10 korrik mes Kurtit, kryetarit të LDK-së Lumir Abdixhiku dhe ish-presidentes Vjosa Osmani, LVV-ja është njoftuar për parimet mbi të cilat LDK-ja e sheh një marrëveshje të mundshme.

Sipas tij, tash i takon LVV-së që në bisedimet e ardhshme të tregojë nëse i respekton dhe pajtohet me këto parime.

Haziri ka thënë se, në rast se arrihet një pajtim, uniteti i Grupit Parlamentar të LDK-së mund të sigurohet përmes bashkëpunimit të brendshëm.

“Këto nuk janë çështje të thjeshta, por nëse ka vullnet politik dhe ka gatishmëri [nga LVV-ja], atëherë LDK-ja i përmbyll për 24 orë të gjitha çështjet parimore. Neve [në LDK] nuk na ndan asgjë, ndërkaq ndarja e përgjegjësive është krejt e fundit”, ka theksuar Haziri.

Ai ka shprehur besimin në pjekurinë politike të Grupit Parlamentar të LDK-së për të ruajtur unitetin rreth vendimeve të kreut të partisë.

Bisedimet e LDK-së me LVV-në për një marrëveshje të mundshme u pezulluan më 15 korrik, për shkak të kërkesës së një pjese të zyrtarëve të LDK-së për shkarkimin e kryetarit Lumir Abdixhiku, pas pakënaqësive për rezultatin zgjedhor.

Abdixhiku i mbijetoi mocionit për shkarkim, por dallimet dhe mospajtimet brenda LDK-së, të shfaqura përmes votimit pro dhe kundër tij, mbeten të qarta, sipas zyrtarëve të lartë të partisë dhe njohësve të zhvillimeve politike në Kosovë.

Krijimi i unitetit në LDK rreth një vendimi të përbashkët të 18 deputetëve të saj lidhur me një marrëveshje eventuale me LVV-në mbetet sfidë. Në mesin e tyre ka edhe persona që votuan për largimin e Abdixhikut nga kreu i partisë.

Megjithatë, një marrëveshje e mundshme ndërmjet LVV-së dhe LDK-së ende nuk duket në horizont, ndonëse kanë mbetur më pak se një javë deri në seancën konstituive të Kuvendit të Kosovës, e cila është caktuar më 6 gusht.

Me konstituimin e Kuvendit nis rrjedhja e afateve për formimin e Qeverisë së re të Kosovës, por edhe për zgjedhjen e presidentit. Për këtë të fundit, deputetët e legjislaturës së re do të kenë 60 ditë kohë nga data e konstituimit të Kuvendit që ta votojnë kreun e ri të shtetit.