Kryeministri në detyrë i Kosovës Albin Kurti, ka folur rreth tentimit për formimin e Qeverisë së re.
Sot Lëvizja Vetëvendosje e ka dërguar te presidentja Vjosa Osmani, emrin e Glauk Konjufcës, si mandatar për ekzekutivin e ri.
Kurti në një konferencë për media tha se nuk është kurrëfar obligimi të sigurohen 61 nënshkrime.
Ai theksoi se Konjufca i ka të sigurta 56 vota, ato të cilat Kurti i ka pasur në seancën e 26 tetorit.
“Për mandatarin e ri, në tentimin e dytë, Glauk Konjufca, i ka të gjitha votat që i kam pasur unë, ju e dini që në Kuvend të Republikës unë i mora 56 vota nga 61 sa është minimumni i nevojshëm. 56 vota i ka sigurt Glauku, ndoshta merr më shumë. Më pak nuk mund të marrë. Maksimumi im është minimumi i Glaukut”, deklaroi Kurti në konferencën e mbajtur për media.
Shefi i Qeverisë në detyrë theksoi se është dëm i madh të shkohet në dy palë zgjedhje për pak muaj.
“Nuk është kurrëfar obligimi të sigurohen 61 nënshkrime, tentimi i dytë për bindjen tonë përveçse e drejtë është edhe obligim, në mënyrë që të bëhet çmos që të evitohen zgjedhjet e reja. Është dëm i madh nëse detyrohemi të kemi zgjedhje të reja edhe në dhjetor edhe në prill, prandaj edhe sot ne dërguam tek zonja presidente emrin e Glauk Konjufcës, ish-kryetarit të Kuvendit, nënkryetarit të parë të subjektit ku unë jam kryetar që të tentojmë edhe njëherë formimin e Qeverisë, në mënyrë që të mos kemi dy palë zgjedhje për pak muaj, dhe meqenëse opozita po thotë se nuk pranon kurrsesi të votojë buxhet të Qeverisë në detyrë, ndonëse ne e kemi bërë këtë kur ishte kryeministër Avdullah Hoti, atëherë pra le ta kemi një qeveri e cila nuk është më në detyrë, por e votuar në Kuvendin e Republikës së Kosovës dhe le ta kalojmë buxhetin”, tha Kurti në një konferencë të mbajtur për media.
