Maqedonci: FSK-ja do të kryejë operacione speciale në Gazë

Ministri i Mbrojtjes, Ejup Maqedonci, ka thënë se kontingjenti i Forcës së Sigurisë (FSK) që do të zbarkojë në Gazë, do të fokusohet në disa aktivitete, përfshirë çminimin dhe operacionet speciale.

Në një prononcim për KOHËN, ditën kur FSK-ja bëri të ditur se komandanti i saj, gjenerallejtënant Bashkim Jashari ka dërguar një ekip në këtë territor palestinez, për t’u njohur me zonën ku do të zbarkojë kontingjenti nga Kosova, ministri Maqedonci tha se ky moment përbën hap shumë të rëndësishëm për FSK-në dhe për Kosovën në përgjithësi.

“Për herë të parë, FSK-ja po angazhohet në një mision ndërkombëtar të mbështetjes së paqes në një zonë me ndjeshmëri të lartë dhe në një mision të mandatuar nga Këshilli i Sigurimit të OKB-së, çka dëshmon nivelin e profesionalizmit, gatishmërisë operative dhe besueshmërisë që ka arritur Ushtria jonë, por dhe institucionet tona shtetërore në përgjithësi”, ka thënë Maqedonci të dielen. “Ky është një moment që konfirmon se Republika e Kosovës nuk është vetëm përfituese e sigurisë, por edhe kontribuuese aktive për paqen dhe stabilitetin ndërkombëtar, në koordinim të plotë me partnerët tanë strategjikë”.

Ai ka theksuar se për kohën kur do të ndodhë dislokimi i plotë i misionit të FSK-së dhe për zonën ku do të vendoset, do të dihet pas kthimit të ekipit në Kosovë.

“Ekipi i FSK-së që ka mbërritur më Gaza është duke zhvilluar atë që njihet në terminologjinë e mbrojtjes si PDSS (Pre-Deployment Site Survey) që nënkupton njohjen e zonës ku do të zbarkoj dhe operoj kontingjenti i FSK-së, koordinimin me partnerët tanë rreth aspekteve logjistike dhe teknike si dhe aspekte të tjera të koordinimit paraprak. Për kohën e zbarkimit të plotë dhe lokacionit të saktë të zbarkimit do të mësohet pas kthimit të ekipit tonë dhe pranimit të informacioneve shtesë”, ka thënë ministri i Mbrojtjes.