Mbi 1.3 milionë lëvizje qytetarësh gjatë korrikut në pikën kufitare në Morinë, mbi 21 mijë vetëm në 12 orët e fundit

Fluksi i udhëtarëve në Pikën Kufitare në Morinë mbetet i lartë edhe në ditët e fundit të korrikut, ndërsa mijëra qytetarë nga Kosova vijojnë të zgjedhin bregdetin shqiptar për pushimet verore.

Për të përballuar lëvizjen, autoritetet kufitare po operojnë me 12 sportele dhe po zbatojnë marrëveshjen e lëvizjes së lirë mes Shqipërisë dhe Kosovës, duke shmangur pritjet në kufi.

Vetëm gjatë 12 orëve të fundit, në Morinë janë përpunuar të dhënat e mbi 21 mijë qytetarëve dhe të më shumë se 6 mijë automjeteve. Sipas të dhënave kufitare, mbi 12 mijë persona kanë hyrë në territorin shqiptar, ndërsa pjesa tjetër kanë dalë nga vendi, raporton OraNews.

Qytetarët shprehen se kanë zgjedhur bregdetin shqiptar për cilësinë e plazheve dhe shërbimet turistike, duke e cilësuar Shqipërinë një destinacion të preferuar veror.

Ndërkohë, muaji korrik po mbyllet me mbi 1 milion e 362 mijë lëvizje qytetarësh në Pikën Kufitare të Morinit, një tregues i fluksit të lartë që ka shoqëruar sezonin turistik veror.