Qendra Klinike Universitare e Kosovës ka bërë të ditur se gjatë periudhës janar–shtator 2026, në Shërbimin e Logopedisë kanë vijuar rregullisht trajtimin 112 fëmijë, për të cilët janë realizuar 3 mijë e 48 shërbime logopedike dhe 141 vlerësime logopedike.
Sipas QKUK-së, Shërbimi i Logopedisë, në kuadër të Klinikës së Otorrinolaringologjisë, ofron shërbime të vlerësimit, diagnostikimit, trajtimit dhe rehabilitimit për fëmijët me çrregullime të komunikimit, gjuhës dhe të folurit.
“Trajtimet zhvillohen në seanca individuale, një deri në dy herë në javë, me kohëzgjatje prej 30–45 minutash, në varësi të nevojave të fëmijës”, thuhet në njoftimin e QKUK-së.
Shërbimi trajton fëmijë me vonesa në zhvillim, vonesa në të folur dhe në gjuhë, çrregullime fonologjike dhe dislali, belbëzim, apraksi, çrregullime të zërit, çrregullime të spektrit autik, dëmtime të dëgjimit, paralizë cerebrale dhe vështirësi në të nxënë.
QKUK-ja ka bërë të ditur se që nga marsi i vitit 2025 kapacitetet janë zgjeruar me një kabinet shtesë, ndërsa është investuar edhe në përmirësimin e ambientit.
Përveç punës klinike, stafi i Shërbimit të Logopedisë është i angazhuar edhe në edukim, vetëdijesim dhe zhvillim profesional, përmes trajnimeve dhe ligjëratave për prindër, edukatorë, mësimdhënës dhe profesionistë të fushave të ndryshme.
“Intervenimi i Hershëm” mbetet motoja e Shërbimit të Logopedisë, duke theksuar rëndësinë e ndërhyrjes në kohën e duhur për zhvillimin e komunikimit, integrimin social dhe përmirësimin e cilësisë së jetës së fëmijëve.
