“Me motorsharrë në dorë”, dy persona pengojnë policët në Parkun Nacional ‘Sharri’

Të martën rreth orës 18:30, zyrtarët policorë të angazhuar me detyrë sekondare në Parkun Nacional “Sharri”, së bashku me zyrtarët e pyjeve, gjatë patrullimit në terren, kanë hasur në një mjet transportues të druve në të cilin ndodheshin tre persona.

Pas ndalimit të mjetit, sipas njoftimit zyrtar, dy nga personat kanë penguar vazhdimisht zyrtarët policorë gjatë kryerjes së detyrës zyrtare.

“Gjatë arrestimit të shoferit të mjetit, njëri prej tyre, duke mbajtur në dorë një motorsharrë, ka vazhduar pengimin ndaj zyrtarëve policorë”, bëhet e ditur në njoftim.

Lidhur me rastin, njësia e hetimeve të stacionit ka kontaktuar prokurorin e shtetit, i cili ka urdhëruar inicimin e rastit penal për dy personat e dyshuar I.D dhe F.d për veprën penale “Pengim i personit zyrtar në kryerjen e detyrës zyrtare”.

Ndërsa për shoferin e mjetit, i cili kishte tentuar t’i shmangej policisë, është urdhëruar inicimi i një shënimi zyrtar, i cili do të hetohet nga hetimet e stacionit në bashkëpunim me zyrtarët e Parkut Nacional “Sharri”, me qëllim identifikimin e vendndodhjes së prerjes së druve.

Po ashtu, ndaj tij është shqiptuar gjobë për moszbatim të urdhrave të zyrtarit policor.

Policia ndër të tjera ka bërë të ditur se personat e dyshuar janë liruar në procedurë të rregullt.