“Ngjarje tektonike” – Reuters për verdiktin që pritet ndaj Thaçit në Hagë

Agjencia ndërkombëtare e lajmeve Reuters i ka kushtuar një artikull të gjerë gjykimit ndaj ish-presidentit të Kosovës, Hashim Thaçi, dhe ish-krerëve të tjerë të UÇK-së, aktgjykimi ndaj të cilëve pritet të shpallet të mërkurën në Hagë.

Reuters e vlerëson vendimin si një moment me rëndësi të madhe për Kosovën dhe rajonin, ndërsa thekson se rezultati i procesit mund të ndikojë në marrëdhëniet e Kosovës me vendet perëndimore, veçanërisht me Shtetet e Bashkuara, si dhe në raportet me Serbinë.

Prokuroria ka kërkuar nga 45 vjet burgim për Thaçin dhe tre ish-komandantët e tjerë të UÇK-së. Të katër të akuzuarit i kanë mohuar akuzat, ndërsa mbrojtja ka kërkuar shpalljen e tyre të pafajshëm.

Në qytete të ndryshme të Kosovës janë vendosur ekrane të mëdha për numërimin mbrapsht deri në shpalljen e aktgjykimit, ndërsa mijëra qytetarë morën pjesë të shtunën në tubimin e mbajtur në Prishtinë, ku kërkuan lirimin e ish-krerëve të UÇK-së.

Sipas Reuters, procesi ka rikthyer në vëmendje kujtimet e luftërave të Ballkanit të viteve ’90 dhe ndarjet e thella etnike që vazhdojnë të jenë të ndjeshme në rajon.