Ngrihet aktakuzë ndaj dy mjekëve të Vushtrrisë për marrje ryshfeti

Prokuroria Themelore në Mitrovicë ka ngritur aktakuzë ndaj dy mjekëve të spitalit të Vushtrrisë, V.R., dhe E.S. nën dyshimin për marrje ryshfeti.

Po ashtu, aktakuzë është ngritur edhe ndaj nëntë personave të tjerë për dhënie ryshfeti: F.V., B.Q., F.Xh., B.G., B.A., K.H., S.N., V.Y., L.K.

Sipas kërkesës së prokurorisë mjeku V.R., në gjashtë raste, ndërkaq mjeku E.S., në tri raste, në cilësinë e personit zyrtar – mjekë në spitalin e Vushtrrisë, në mënyrë të drejtpërdrejtë kërkojnë dhe pranojnë para në shuma të ndryshme në mënyrë që të veprojnë në përputhje me detyrën e tij zyrtare për ofrimin e shërbimeve të trajtimit mjekësor për pacientët.

Ndërkaq, nëntë të pandehurit F.V., B.Q., F.Xh., B.G., B.A., K.H., S.N., V.Y. dhe L.K. akuzohen se, në mënyrë të drejtpërdrejtë ose të tërthortë, për vete apo për persona të tjerë, u kanë premtuar, ofruar ose dhënë mjekëve të akuzuar shuma të ndryshme parash, nga 50 deri në 300 euro, si shpërblim për operimin e familjarëve të tyre.

Prokuroria Themelore në Mitrovicë me rastin e ngritjes së aktakuzës ka kërkuar nga gjykata që të pandehurit t’i shpallë fajtorë për veprat e kryera penale dhe t’i dënojë sipas ligjit.