Pa rrymë e pa telefona, ingjinieri tregon çfarë do ta gjente Kosovën po të mos intervenohej në kanalin e Ibër-Lepncit menjëherë pas sulmit

Drejtor i Departamentit të rigjenerimit në Ibër Lepenc, Ernes Kerçeli po jep dëshmin e tij në Gjykatën Themelore në Prishtinë atje ku ka filluar seanca gjyqësore ndaj Jovan dhe Dragisha Viqentijeviq, të akuzuar për përfshirje në sulmin terrorist ndaj kanalit të Ibër-Lepencit, i cili ndodhi në nëntor të vitit 2023, raporton GazetaDemos.

Kerçeli teksa foli për dëmin e jashtëzakonshëm, tregoi gjithashtu edhe për peripecit që kaluan për ta rikthyer gjendjen e mëparshme funksionale në këtë kanal. “Dëmi ka qenë jashtëzakonisht i madh, kemi punuar më shumë se një muaj për ta rikthyer siç ka qenë para sulmit. Një kodër e madhe është dashur të gërryhet dhe të betonohet sërish për t’u rikthyer në gjendjen e mëparshme”, tha ai.

Madje, Kerçeli gjithashtu tregoi për dëmet e mundshme që ishin planifikuar të ndodhnin me rastin e këtij sulmi, të cilat u parandaluan falë intervenimit të shpejt në dëmin e shkaktuar.

“Nëse nuk do të intervenonim menjëherë, Kosova s’do të kishte rrymë, linjat telefonike do të binin nga sistemi, gjithashtu edhe termocentrali B do të dilte nga funksioni, teksa dëmet do t’i preknin milionat”, shtoi ai.