Ministrja në detyrë e Mjedisit, Fitore Pacolli, ka bërë me dije se së shpejti do të prezantohet Ligji i Ri për Mbeturinat, i cili pritet të rregullojë në mënyrë më të qartë dhe më të integruar sektorin e mbeturinave.
Kjo u bë e ditur bashkë me njoftimin për takimin e parë koordniues me partnerë ndërkombëtar, lidhur me menaxhimin e mbeturinave, shkruan IndeksOnline.
“Në javët në vijim do të punojmë edhe në ndryshimet e nevojshme të legjislacionit sekondar, për të krijuar kushtet për funksionalizimin e sistemit të kthimit të shisheve dhe kanaqeve. Tani është koha që strategjitë dhe ligjet t’i kthejmë në veprime konkrete dhe rezultate të matshme” njofton Pacolli.
Ky është postimi i plotë i saj:
Sektori i mbeturinave është një nga prioritetet tona kryesore.
Sot zhvilluam takimin e parë koordinues me partnerët dhe akterët kryesorë, përfshirë Zyrën e Bashkimit Evropian në Kosovë, Ambasadën Gjermane, KfË, GIZ dhe KMDK. Diskutuam për sfidat, prioritetet dhe hapat konkretë që duhet të ndërmarrim për të përmirësuar menaxhimin e mbeturinave në Kosovë.
Kosova tashmë ka një Strategji të Integruar për Menaxhimin e Mbeturinave. Ndërkohë, së shpejti do të prezantojmë Ligjin e Ri për Mbeturinat, i cili do të rregullojë më qartë dhe në mënyrë më të integruar këtë sektor.
Në javët në vijim do të punojmë edhe në ndryshimet e nevojshme të legjislacionit sekondar, për të krijuar kushtet për funksionalizimin e sistemit të kthimit të shisheve dhe kanaqeve. Tani është koha që strategjitë dhe ligjet t’i kthejmë në veprime konkrete dhe rezultate të matshme.
