Kryetari i Prishtinës, Përparim Rama, ka njoftuar për një takim me Princin Naif bin Abdullah bin Saud bin Abdulaziz Al Saud dhe një delegacion investitorësh potencialë, të cilëve u janë prezantuar projektet strategjike dhe potenciali zhvillimor i kryeqytetit.
Përmes një postimi në Facebook, Rama ka thënë se synimi është krijimi i vendeve të reja të punës dhe zhvillimi i infrastrukturës moderne në Prishtinë.
“Zhvillim që krijon vende pune e infrastrukturë moderne. Ky është vizioni ynë, kjo është çka meriton Prishtina”, ka shkruar Rama.
Ai ka bërë të ditur se në takim është diskutuar për projektet strategjike dhe mundësitë e investimeve në kryeqytet.
Në këtë frymë, kryetari i Prishtinës ka mirëpritur princin saudit dhe delegacionin e investitorëve, duke theksuar rëndësinë e partneriteteve të reja ndërkombëtare.
Rama ka përmendur edhe angazhimin e kompanisë Strategic Group, duke thënë se ajo po sjell përvojë, kredibilitet dhe rrjet ndërkombëtar në vendlindje.“Mirënjohje Arianit Shehut dhe Strategic Group, që përvojën, kredibilitetin dhe rrjetin ndërkombëtar po i sjell në vendlindje, duke krijuar ura konkrete drejt kapitalit dhe partneriteteve të reja”, ka shkruar ai.
Në postimin e tij, Rama ka falënderuar edhe ish-presidenten Atifete Jahjaga për gatishmërinë e saj për të kontribuar në iniciativa që avancojnë zhvillimin e vendit.
“Faleminderit edhe ish-Presidentes Atifete Jahjaga, gjithmonë e gatshme të kontribuojë në iniciativa që avancojnë zhvillimin e vendit”, thuhet në postim.
Në fund, kryetari i Prishtinës ka theksuar se puna për zhvillimin e kryeqytetit do të vazhdojë.
“Ne nuk do të ndalim punën sepse qytetarët e Prishtinës kanë votuar për zhvillim! Vazhdon”, ka përfunduar Rama.
