Prokuroria Speciale ka ngritur aktakuzë ndaj një personi me inicialet M.Gj., i dyshuar për krime lufte kundër popullsisë civile në Komunën e Zveçanit gjatë periudhës 1998–1999.
Prokuroria bëri të ditur se, sipas aktakuzës, i pandehuri, në bashkëkryerje me pjesëtarë të tjerë të forcave policore serbe dhe në cilësinë e komandantit të Repartit Policor (përbërja rezerve) në Komunën e Zveçanit, akuzohet për vrasje, trajtim çnjerëzor, frikësim, shkatërrim të pasurisë, dëbim masiv dhe spastrim etnik të popullatës civile.
“Prokuroria Speciale e Republikës së Kosovës ka ngritur aktakuzë ndaj të pandehurit M.Gj. për kryerjen e veprës penale “Krime lufte kundër popullsisë civile”. Sipas aktakuzës, gjatë periudhës 1998 – 1999, në Komunën e Zveçanit, i pandehuri M.Gj., në bashkëkryerje me pjesëtarët të tjerë të forcave policore serbe dhe nën përgjegjësinë individuale dhe atë komanduese, në cilësinëe e Komandantit të Repartit Policor (përbërja rezerve) në Komunën e Zveçanit, ka kryer vrasje, trajtim çnjerëzor, frikësim, shkatërrim të pasurisë, dëbim masiv dhe spastrim etnik të popullatës civile”, thuhet në komunikatë.
Sipas aktakuzës, Prokuroria thotë se gjithashtu, “më 29 prill 1999, i pandehuri me pjesëtarë të tjerë të paindentifikuar, të organiuzuar në formacione të strukturuara, të uniformuar, pjesëtarë të Ushtrisë Jugosllave dhe të policisë serbe, kishte ndërmarrë operacion për rrethimin e fshatit në Komunën e Zveçanit”.
