Ish-ministri i Shëndetësisë i Kosovës, Rifat Latifi, i ka drejtuar një letër presidentit ukrainas Volodymyr Zelensky, pas deklaratës së këtij të fundit në Beograd se Ukraina nuk e njeh pavarësinë e Kosovës.
Latifi, në letër shpreh zhgënjim të thellë për qëndrimin e Kievit ndaj pavarësisë së Kosovës, duke e cilësuar deklaratën e Zelenskyt në Beograd si një qëndrim që, sipas tij, bie ndesh me interesat dhe përvojën e vetë Ukrainës.
“Çdo argument që është përdorur kundër Kosovës, është përdorur edhe kundër jush, nga e njëjta fuqi dhe me të njëjtat fjalë”, shkruan ish-ministri.
Ai thekson se Kosova ka qenë në krah të Ukrainës që nga fillimi i agresionit rus, duke përmendur mbështetjen për sanksionet evropiane dhe amerikane ndaj Rusisë, pritjen e gazetarëve dhe familjeve ukrainase, si dhe njohjen e Ukrainës brenda kufijve të saj ndërkombëtarisht të njohur, përfshirë Krimenë.
Latifi kujtoi gjithashtu angazhimin e tij personal ndaj Ukrainës.
“Si shqiptaro-amerikan nga Kosova, unë e vizitova Ukrainën për t’i dalë në ndihmë pas pushtimit të parë”, shkruan ai, duke shtuar se shpreson që në një vizitë të ardhshme ta shohë Ukrainën të lirë.