Kryetari i Prishtinës, Përparim Rama, ka theksuar rëndësinë kombëtare të mbrojtjes së vlerave të Ushtrisë Çlirimtare të Kosovës, duke apeluar për unitet shoqëror përtej përkatësive politike.
Rama tha se çështja e UÇK-së “është çështje e vlerave kombëtare”, ndaj “i gjithë populli duhet t’i dalë në ballë, pa marrë parasysh përkatësinë apo mendimin politik”.
Ai kujtoi se që nga fillimi i mandatit të tij, Komuna e Prishtinës ka krijuar një sektor të posaçëm brenda kabinetit të kryetarit, i cili merret drejtpërdrejt me ruajtjen dhe promovimin e vlerave të UÇK-së.
“Është çështje e vlerave kombëtare të cilave normal që duhet me iu dalë në ballë i gjithë populli pa marrë parasysh përkatësisë, mendimit apo kahjes partiake. Këtë e kam tregu qysh tash gati katër vite që ne si Kryeqytet jemi të parët dhe të vetmit deri sot që e kemi sektorin përbrenda Kabinetit të Kryetarit që merret drejtpërdrejt me vlerat e Ushtrisë Çlirimtare të Kosovës. Normal që unë i kam përkrahë protestat të cilat kanë qenë të drejta dhe kanë qenë për me i mbrojtë këto vlera. Kanë qenë për drejtësi që t’i shtyjmë proceset përpara për të mirën e kombit tonë, herojnëve tanë, një lufte që ka qenë e drejtë, luftë çlirimtare.” – tha Rama.
Duke iu referuar procesit gjyqësor në Hagë ndaj ish-udhëheqësve të UÇK-së, Rama e quajti atë një proces të stërzgjatur, por shprehu besim në drejtësi, duke shpresuar se “e drejta do të triumfojë dhe procesi do të përfundojë sa më shpejt të jetë e mundur”.
“Normal që ajo çka ndodh sot në Hagë është një proces i stërzgjatur ku edhe unë po them besoj në drejtësi që e drejta duhet të triumfojë, të fitojë dhe të përfundojë procesi sa më shpejtë që është e mundur.” – tha Rama për VOX Kosova.
