Një rojë nderi e ushtrisë amerikane, që ishte duke e ruajtur Varrin e Ushtarit të Panjohur, i qortoi sekretarin e Mbrojtjes të ShBA-së, Pete Hegseth, dhe një grup të këshilltarëve të tij të lartë të mërkurën, pasi disa nga grupi qeshën dhe biseduan afër memorialit solemn pas një ceremonie për Ditën e Veteranëve.
“Të gjithë vizitorët do ta mbajnë atmosferën e qetësisë dhe respektit në çdo kohë” – tha me zë të lartë roja ushtarake, duke e ndalur patrullimin për t’i dalë përballë grupit të zyrtarëve që po largoheshin shkallëve, raporton televizioni CNN.
Hegsethi ishte duke qëndruar në këmbë dhe duke u fotografuar përballë varrit me bashkëshorten e vet, Jennifer, me shefin e stafit, Ricky Buria, zëvendësshefin e stafit, Patrick Weaver, dhe këshilltaren e lartë, Tami Radabaugh, pas ceremonisë së mbajtur në Varrezën Kombëtare “Arlington” për Ditën e Veteranëve.
Disa prej personave në këtë grup ishin duke qeshur dhe duke biseduar pasi ishin fotografuar, duke e nxitur ushtarin që t’i qortonte dhe t’i përmirësonte.
