Gjykata Themelore në Prishtinë ka marrë vendim lidhur me rastin e Dibran Hoxhajt dhe të tjerëve lidhur me vrasjen e 3 janarit të 2023-ës në lokalin “Kobra City”.
“Kobra” është dënuar me 24 vite burgim për veprën penale “vrasje e rëndë”.
Ndërkaq, Roland Susuri, Arben Vezaj, Burim Mazreku dhe Jesmir Badallaj janë dënuar për për pjesëmarrje në rrahje, për manipulim me prova, dhe për armëmbajtje pa leje.
Ronald Susuri është dënuar me shtatë vite burgim, Vezaj me 2 vite, Burim Mazreku një vit dhe Jesmir Badallaj dy vite.
Natën e 3 janarit, 31 vjeçari Visart Cengu së bashku me dy shokët e tij, kishin dal për t’u argëtuar. Ata kishin zgjedhur lokalin “Kobra City” për ta kaluar natën e tretë festive të vitit të ri.
Fatura në vlerë prej 400 eurosh, u tha se u bë shkas që Visart Cengu, Rufgen Shehu dhe A.B të përleshen brenda lokalit në fjalë.
Në kohën kur të përmendurit kishin dal nga lokali, në parking i kishte pritur Dibran Hoxhaj. Hoxhaj kishte shtënë me armë në drejtim të veturës së tyre.
I vrarë mbeti Visart Cengu dhe i plagosur Rufgen Shehu. Ata nuk e ndaluan makinën derisa kaluan kufirin.
“Pas kacafytjeve dhe rrëmujës së krijuar në lokal, të dëmtuarit dalin nga lokali dhe pasi hypin në veturën me targa angleze, për tu larguar, në parkingun e lokalit paraqitet i dyshuari Dibran Hoxhaj, i cili me armë zjarri shtënë në drejtim të veturës, me ç’rast e qëllon të dëmtuarin Visart Cengu, i cili kishte qenë i ulur në ulësen e pasme të veturës dhe Rufgen Shehu, i cili kishte qenë në ulësen e përparme. Si pasojë e këtyre të shtënave me armë zjarri Visart Cengu, ndërron jetë rrugës për në spital të Kukësit, derisa Rufgen Shehu nga plagët e marra nga Kukësi dërgohet në spitalin e Tiranës”, thuhet në dosjen e Prokurorisë.
