Serbia voton sot në zgjedhjet parlamentare të parakohshme, në një kohë kur lëvizja masive e protestave studentore synon të rrëzojë nga pushteti liderin populist Alleksandar Vuçiq, i cili ka qenë në krye të vendit fillimisht si kryeministër e më pas si president për më shumë se një dekadë.
Zgjedhjet, të shpallura nga Vuçiqi në shtator, vijnë pas gati dy vitesh protestash të udhëhequra nga studentët kundër korrupsionit të perceptuar dhe tendencave në rritje autoritare.
Protestat u nxitën nga vdekja e 16 personave, pas shembjes së tendës së çatisë së stacionit hekurudhor në qytetin e Novi Sadit, në vitin 2024. Që atëherë, studentët kanë fituar mbështetje të gjerë në shoqërinë serbe.
Qendrat e votimit hapen në orën 07:00 dhe mbyllen në orën 20:00, ndërsa rezultatet e para pritet të bëhen të ditura rreth dy orë pas mbylljes së tyre, shkruan Reuters.
Një fitore e studentëve do të përbënte një ndryshim të thellë politik në këtë vend të Ballkanit, me rreth gjashtë milionë banorë. Ajo do të kujtonte humbjen e Viktor Orbanit në Hungari, në prill të këtij viti, dhe mund të shërbente si model për lëvizjet e tjera studentore në Evropë.
Javët e fundit, lëvizje të tilla kanë dalë në rrugë për të protestuar kundër cilësisë së dobët të arsimit dhe mungesës së perspektivës për të ardhmen. Në disa raste, protestat kanë degjeneruar edhe në dhunë.
Megjithatë, Vuçiqi mbetet një kundërshtar i fortë politik. Ai ka dhënë dorëheqjen nga posti i presidentit për të kandiduar sërish për kryeministër. Shumë votues ia atribuojnë atij nxjerrjen e Serbisë nga prapambetja ekonomike dhe periudhën e modernizimit të vazhdueshëm, të shoqëruar me ndërtimin e autostradave, hekurudhave, shkollave dhe spitaleve.
Pavarësisht pakënaqësisë së madhe të një pjese të shoqërisë, rezultati i zgjedhjeve mbetet vendimtar për të ardhmen politike të Serbisë dhe për forcën që lëvizja studentore mund të ketë në ndryshimin e skenës politike të vendit.
