Themelimi i Xhandarmërisë, Kurti: Ka kohë që e kemi menduar këtë gjë

Kryeministri në detyrë, Albin Kurti ka folur sërish rreth formimit të xhandarmërisë së Kosovës.

Ai tha se detajet e hollësishme do t’i japin shumë shpejt por që ka kohë që e kanë menduar diçka të tillë.

“Rreth dokumentit dhe grupit punues dhe hollësive sa i përket xhandarmërisë do t’ju njoftojmë shumë shpejt. Ka kohë që ne e kemi menduar këtë gjë, për shkak se një aspekt tejet i rëndësishëm për sigurinë e Kosovës ka të bëjë me një zonë e cila është më shumë se policia e më pak se ushtria. Prej ruajtjes së kufirit, te luftimi i terrorizmit, te mbyllja e çfarëdo shtegu të kontrabandës, e deri te kontrolli i infrastrukturës kritike”, tha Kurti para gazetarëve.

Të martën e 19 majit, Ministri në detyrë i Punëve të Brendshme, Xhelal Sveçla njoftoi se veçse ka nisur hapat për themelimin e xhandarmërisë.

Ai tha se xhandarmëria do të funksionojë si agjencion në kuadër të Ministrisë së Punëve të Brendshme e Kosovës dhe do të ketë rol të rëndësishëm në forcimin e arkitekturës së sigurisë së shtetit.

“Xhandarmëria përfaqëson një hap të rëndësishëm në konsolidimin e arkitekturës sonë të sigurisë, me mision të qartë për të garantuar prezencë të fuqishme shtetërore në funksion të ruajtjes së kufijve, integritetit dhe sovranitetit territorial”, tha mes tjerash Sveçla.