Tragjedi në Kretë, humb jetën shqiptari pas dy javësh në koma nga incidenti në det

Një 33-vjeçar shqiptar ka humbur jetën në ishullin e Kretës, në Greqi, pasi për rreth dy javë qëndroi në koma pas një incidenti të rëndë në det.

Bëhet fjalë për Roland Salën, me origjinë nga Peshkopia e Dibrës, i cili jetonte prej vitesh në Angli dhe kishte udhëtuar drejt Kretës për të kaluar pushimet pranë familjarëve.

Sipas raportimeve, ngjarja e rëndë ka ndodhur në zonën e Rethimnos, ku i riu shqiptar u përfshi nga dallgët e detit dhe pësoi asfiksi. Ai u nxor nga uji dhe u dërgua me urgjencë në spital, ku mjekët u përpoqën për ditë të tëra t’i shpëtonin jetën.

Pavarësisht kujdesit intensiv dhe përpjekjeve të stafit mjekësor, Roland Sala nuk arriti të mbijetojë.

Lajmi për ndarjen e tij nga jeta ka prekur komunitetin shqiptar në Rethimno, i cili ka shprehur ngushëllime për familjen, të afërmit dhe miqtë e 33-vjeçarit.

Trupi i tij pritet të dërgohet drejt Shqipërisë, ku do të zhvillohet ceremonia e varrimit në vendlindje.