Tronditet Peja nga vrasja e Arlinda Zekajt, kunati i dyshuar ende në arrati

I dyshuari për vrasjen e Arlinda Zekajt, e cila u vra mbrëmjen e së dielës në Vitomiricë të Pejës, ndodhet ende në arrati. Kështu ka njoftuar Policia e Kosovës mëngjesin e sotëm, pas rastit të rëndë që tronditi këtë zonë.

Arlinda Zekaj është gjetur pa shenja jete të dielën mbrëma në fshatin Vitomiricë të Pejës, vetëm pak orë pasi ishte raportuar një rast i dhunës në familje.

Sipas njoftimit të Policisë së Kosovës, rreth orës 19:00, Stacioni Policor në Pejë ishte njoftuar për një rast të dhunës në familje. Viktima ishte shoqëruar në stacionin policor, ku ishte intervistuar, ndërsa ishte arrestuar dhe intervistuar edhe bashkëshorti i saj, i cili dyshohej për këtë rast.

Bazuar në informacionet e policisë, bashkëshorti i viktimës ishte ndaluar për 48 orë, ndërsa gruaja, me vullnetin e saj, ishte dërguar në shtëpinë e saj në Vitomiricë.

Megjithatë, vetëm pak orë më vonë, rreth orës 21:10, policia ishte njoftuar se gruaja ishte gjetur pa shenja jete.

Sipas të dhënave fillestare të policisë, dyshohet se vdekja e saj është shkaktuar nga goditjet me një mjet të fortë.

Ndërkohë, lidhur me rastin e vrasjes, si i dyshuar është identifikuar një person që dyshohet se është kunati i viktimës, i cili aktualisht ndodhet në arrati dhe po kërkohet nga organet e rendit.

Policia ka bërë të ditur se për rastin është njoftuar edhe Prokurori i Shtetit, i cili ka dalë në vendin e ngjarjes.