Drejtori i Policisë së Kosovës, Gazmend Hoxha, ka thënë se pret që sa më shpejt të zbardhet rasti i vdekjes së Agon Zejnullahut. Ku i ndjeri dyshohet se ka vdekur gjatë arrestimit më datën 7 korrik.
Në një konferencë për media, Hoxha tha se presin që e vërteta të del në shesh.
“Ne shprehim keqardhje për atë se çka ka ndodhur në Lipjan, dhe presim verdiktin final të drejtësisë, dhe presim që e vërteta të del në shesh. Shprehim keqardhje familjes dhe po ashtu ngushëllime, mbetet që Inspektorati dhe Prokuroria të zbardhë sa më shpejt këtë rast të rëndë që e kemi pasur me datën 7 korrik”, u shpreh Hoxha.
Ndryshe, lidhur me rastin pesë policë ndodhen në masën e paraburgimit. Ndërsa, dy ditë më parë, Gjykata e Apelit e Kosovës ka aprovuar ankesat e mbrojtësve së të pandehurve I.N., A.R., A.K., L.Rr. dhe E.B., si dhe sipas detyrës zyrtare ka anuluar aktvendimin e Gjykatës Themelore në Prishtinë, Dega në Lipjan duke e kthyer çështjen në rigjykim.
Sipas një njoftimi për media bëhet e ditur se Gjykata Themelore në Prishtinë, dega në Lipjan të pandehurve të lartcekur u ka caktuar masën e paraburgimit në kohëzgjatje prej një muaji, për shkak të dyshimit se kanë kryer veprën penale vrasje nga pakujdesia.
“Gjykata e Apelit e Kosovës – Departamenti i Përgjithshëm, i ka aprovuar ankesat e mbrojtësve së të pandehurve I.N., A.R., A.K., L.Rr. dhe E.B., si dhe sipas detyrës zyrtare ka anuluar aktvendimin e lartcekur, duke e kthyer çështjen në rigjykim. Kolegji gjykues ka konstatuar se aktvendimi i ankimuar përmban shkelje të dispozitave të procedurës penale të cilat kushtëzojnë anulimin e tij.
Gjykata e Apelit ka vlerësuar se aktvendimi i ankimuar nuk përmban analizën dhe vlerësimin e provave relevante, të besueshme dhe me fuqi provuese për të konstatuar dhe për të vërtetuar se ekziston dyshimi i bazuar se të pandehurit kanë kryer veprën penale për të cilën pretendohet. Andaj, në aktvendimin e Gjykatës së Apelit i është propozuar gjykatës së shkallës së parë t’i evitojë të gjitha shkeljet e konstatuara në aktvendimin e ankimuar, duke e kthyer çështjen në rivendosje”, thuhet në njoftim.
