Zyrtari i AAK-së, Pal Lekaj, ka reaguar ashpër ndaj qeverisë, duke e akuzuar atë për mosrespektim të vendimeve të Gjykatës Supreme dhe shkelje të rëndë të rendit kushtetues.
Lekaj ka deklaruar se qeveria aktuale po injoron qëllimisht vendimet e gjykatës më të lartë në vend, gjë që, sipas tij, është krejtësisht e papranueshme në një shtet që pretendon të jetë demokratik dhe i drejtë.
“Është krejtësisht e papranueshme që një qeveri, e cila pretendon se udhëheq me ligj dhe drejtësi, të refuzojë zbatimin e vendimeve të Gjykatës Supreme. Kjo jo vetëm që shkel parimin e ndarjes së pushteteve, por e dëmton besimin e qytetarëve në shtetin e së drejtës,” ka thënë Lekaj.
Reagimi i plotë:
Qeveria e Kosovës nuk i përfill vendimet e Gjykatës Supreme. Si mund të ndodhë kjo në një shtet demokratik?
Është krejtësisht e papranueshme që një qeveri, e cila pretendon se udhëheq me ligj dhe drejtësi, të refuzojë zbatimin e vendimeve të Gjykatës Supreme. Kjo jo vetëm që shkel parimin e ndarjes së pushteteve, por e dëmton besimin e qytetarëve në shtetin e së drejtës.
Në një shtet demokratik, askush nuk është mbi ligjin, përfshirë edhe qeverinë. Moszbatimi i vendimeve të Gjykatës Supreme është një formë e hapur e shkeljes së rendit kushtetues dhe i hap rrugë kaosit institucional. Një qeveri që e lejon këtë, nuk mund të flasë më për drejtësi e reforma, sepse vetë po minon themelet e drejtësisë.
