Von der Leyen vjen në Kosovë më 1 tetor, këto janë takimet e saj në Prishtinë

Presidentja e Komisionit Evropian, Ursula von der Leyen, do ta vizitojë Kosovën të enjten, më 1 tetor. Në Prishtinë, ajo, siç ka bërë të ditur zyra e saj, pritet të takohet me ushtruesen e detyrës së presidentes, Albulena Haxhiu, dhe kryeministrin Albin Kurti.

Vizita është pjesë e turneut të saj në Ballkanin Perëndimor. Von der Leyen nis turneun e saj Ballkanik me qëndrimin në Tiranë, të mërkurën, ndërsa pas Prishtinës do të udhëtojë në Podgoricë, të enjten. Vizitën do ta përfundojë të premten në Shkup. Sipas Komisionit Evropian, bisedimet do të përqendrohen te rruga drejt BE-së, integrimi gradual dhe Plani i Rritjes për rajonin.

Gjermanja e BE-së realizon vizitën në Ballkan ndërsa Komisioni po përgatit udhërrëfyes për vendet kandidate që kanë përparuar më shumë. Von der Leyen e paralajmëroi këtë nismë në fjalimin e saj të 16 shtatorit, pa i emërtuar vendet. Sipas raportimeve të mediave, udhërrëfyesit pritet t’u kushtohen Shqipërisë e Malit të Zi në Ballkanin Perëndimor, por edhe Moldavisë e Ukrainës, në pjesën tjetër të lindjes së Evropës. Ata synojnë të përcaktojnë reformat, kushtet dhe afatet orientuese për hapat e negociatave. Propozimet ende nuk janë paraqitur zyrtarisht.

Në Podgoricë, von der Leyen do të takohet me presidentin Jakov Milatoviq dhe kryeministrin Milojko Spajiq. Mali i Zi është vendi më i avancuar në negociatat e anëtarësimit: ka hapur të 33 kapitujt dhe ka mbyllur përkohësisht 18 prej tyre, sipas njoftimit më të fundit të Komisionit. BE-ja ka nisur edhe përgatitjen e traktatit të anëtarësimit dhe ka paraqitur një paketë financiare për kalimin potencial të këtij vendi drejt anëtarësimit, sipas raportimeve nga komisioni Evropian.

Serbia dhe Bosnja e Hercegovina nuk janë pjesë e këtij turneu. Komisioni ka thënë se von der Leyen synon t’i vizitojë më vonë, për shkak të zgjedhjeve të ardhshme në këto vende.